Big Way Of Life

Mae arbenigwyr yn yr Unol Daleithiau wedi datblygu patrwm ar gyfer ffreutur ysgol newydd ddylai, yn ddamcaniaethol, annog plant i fwyta'n iachach ac felly fynd i'r afael â gordewdra. Gwnaeth­ Brian Wansink a David R Just, sy'n ymchwilwyr ym Mhrifysgol Cornell, gyfres o arbrofion mewn ysgolion yn yr Unol Daleithiau; maen nhw'n credu bod modd newid sut y mae plant yn dewis bwyd yn y ffreutur drwy ddefnyddio seicoleg ymddygiad tebyg i'r hyn y mae archfarchnadoedd yn ei ddefnyddio.

Prif argymhellion yr astudiaeth oedd:

• Symud y brocoli: roedd gosod bwydydd maethlon ar gychwyn y ciw cinio wedi cynyddu'r swm a brynwyd rhwng 10 a 15%.
• Lleihau maint powlenni o 18 owns i 14 owns: roedd hyn yn lleihau dogn cyfartalog grawnfwyd 24%.
• Annog defnyddio hambwrdd: roedd hyn yn cynyddu faint o lysiau oedd yn cael eu bwyta. Roedd myfyrwyr heb hambwrdd yn bwyta 21% yn llai o salad ond dim llai o hufen ia.
• Rhoi enwau mwy disgrifiadol i ddewisiadau iach: roedd defnyddio 'creamy corn' yn hytrach na 'corn' ar ei ben ei hun wedi cynyddu gwerthiant 27%.
• Cynnig dewis: Roedd myfyrwyr oedd yn cael dewis rhwng moron a seleri'n llawer mwy tebygol o fwyta eu llysiau na myfyrwyr oedd yn cael eu gorfodi i gymryd moron yn unig.
• Cuddio'r hufen ia: Roedd cadw'r hufen ia mewn rhewgell gyda chaead di-draidd wedi'i gau yn lleihau gwerthiant yn sylweddol.
• Gofyn ydyn nhw eisiau salad: pan oedd gweithwyr yn gofyn 'Ydych chi eisiau salad?', roedd gwerthiant wedi cynyddu traean.
• Creu ciw llwybr cyflym: roedd creu man talu 'llwybr cyflym' i fyfyrwyr nad oedd yn prynu pwdin a sglodion wedi dyblu gwerthiant brechdanau iach.
• Defnyddio powlenni ffrwythau: roedd rhoi afalau a gellyg mewn powlen ffrwythau yn hytrach na phadell dur gwrthstaen wedi mwy na dyblu gwerthiant.
• Symud y bar salad: roedd tynnu'r bar salad i ffwrdd o'r wal a'i osod o flaen y man talu wedi treblu gwerthiant bron iawn.
• Talu arian parod am bwdin: roedd gwrthod gadael i fyfyrwyr ddefnyddio talebau cinio i dalu am bwdin wedi eu harwain i brynu 71% yn fwy o ffrwythau a 55% yn llai o bwdinau.

Er mwyn gweld hyn i gyd wedi'i gyflwyno mewn graffigyn tlws ewch draw i wefan y Guardian fan hyn.