Big Way Of Life

Gallai clefyd yr iau effeithio ar fywydau dros 500,000 o bobl ifanc yn sgil gordewdra mewn plant, yn ôl un o arbenigwyr y llywodraeth.

Rhybuddiodd yr Athro Martin Lombard, cyfarwyddwr clinigol cenedlaethol yr Adran Iechyd ar yr iau, fod y DU'n wynebu sefyllfa ffrwydrol mewn perthynas â chlefyd yr iau.

Mae un o bob pedwar plentyn pedair a phump oed dros eu pwysau neu'n ordew, gan eu rhoi mewn perygl o glefyd iau brasterog analcoholig. .

Mae hyn yn digwydd pan fydd braster yn adeiladu yn yr iau, gan achosi llid a chwydd ac mewn rhai achosion gall arwain at sirosis yr iau sy'n gallu bod yn farwol.

Yn ôl ffigurau'r llywodraeth, gallai tua 500,000 o blant rhwng 4 a 14 fod mewn perygl o gael clefyd yr iau, yn cynnwys 60,000 o blant 10 oed.

Bydd y broblem yn gwaethygu wrth i ordewdra gynyddu; mae arbenigwyr yn rhagweld y bydd 63% o blant yn ordew erbyn 2050.

Meddai Sarah Matthews, o Ymddiriedolaeth yr Iau Prydain: "Er mai alcohol sy'n cael ei weld fel prif achos clefyd yr iau yn y DU, mae niwed i'r iau'n gysylltiedig â phwysau yn mynd i fod yn broblem enfawr i iechyd y cyhoedd, os yw'r hyn a ragwelir yn profi i fod yn wir gallai gordewdra drechu alcohol fel y prif yrrwr sirosis yn y dyfodol."