Big Way Of Life

Roedd cais Llundain i gynnal y gemau Olympaidd yn cynnwys rhai addewidion mawr: erbyn 2013 byddai miliwn yn fwy o bobl yn cymryd rhan mewn chwaraeon dair gwaith neu fwy yr wythnos, gyda miliwn arall yn cymryd rhan mewn mwy o weithgaredd corfforol. Cafodd y targedau hyn eu beirniadu o’r dechrau’n deg am eu bod yn canolbwyntio ar bobl oedd eisoes yn actif, ac oherwydd nad oes unrhyw ddinas arall sydd wedi cynnal y chwaraeon wedi llwyddo i gynyddu cyfranogiad mewn chwaraeon o ganlyniad i gynnal y Gemau.

Dros ddwy flynedd i mewn i’r cyfnod o bedair blynedd sy’n rhan o Gynllun Chwaraeon Cyflawn y Blaid Lafur, mae nifer y bobl sy’n chwarae camp dair neu fwy o weithiau’r wythnos wedi cynyddu dim ond 109,000 ac mae nifer y bobl sydd ddim yn chwarae unrhyw gamp o gwbl wedi cynyddu.

Dywedodd Tessa Jowell, gweinidog Gemau Olympaidd yr Wrthblaid, wrth yr uwchgynhadledd Legacy Ready a gynhaliwyd gan Gymdeithas y Diwydiant Ffitrwydd a’r Sefydliad dros Reoli Chwaraeon a Gweithgaredd Corfforol nad oedd hi’n difaru dim am osod y targedau uchelgeisiol.

"Dydw i ddim yn berson sydd ag alergedd i grŵp o dargedau bach, dethol a phwrpasol. Mae tryloywder yn bwysig ac roedd y ddau darged yma mewn chwaraeon a gweithgaredd corfforol yn canolbwyntio ar greu ymdeimlad o genhadaeth a phwrpas cenedlaethol," meddai.

Wrth ysgrifennu yn yr Huffington Post y mis diwethaf, meddai: “Mae’r addewid a wnaethon ni yn Singapore i ysbrydoli cenhedlaeth newydd o fabolgampwyr ifanc dan fygythiad,” ac aeth ymlaen i amlygu nifer o ffyrdd y mae’r Llywodraeth Clymblaid wedi gwneud toriadau neu wedi methu â gweithredu ar chwaraeon mewn ysgolion. Tynnodd sylw hefyd at y ffaith fod y Llywodraeth wedi diddymu’r Arolwg Chwaraeon Ysgolion blynyddol, gan ei gwneud hi’n amhosibl i fesur effaith y toriadau y maen nhw wedi eu gwneud.