Big Way Of Life

Yn dilyn ymgynghoriad cyhoeddus yn ystod haf 2009, mae'r Asiantaeth Safonau Bwyd wedi argymell bod gwneuthurwyr bwyd yn lleihau braster dirlawn mewn bwydydd fel bisgedi, cacenni, byns, siocledi a lleihau'r siwgr sy'n cael ei ychwanegu i ddiodydd meddal.

Mae'r Asiantaeth hefyd am weld rhagor o feintiau llai, un dogn, ar gael gyda rhai o'r bwydydd hyn, sy'n cyfrannu llawer o'r braster dirlawn a'r calorïau yn ein diet.

Mae'r Asiantaeth yn annog diwydiant i:

• Leihau braster dirlawn mewn bisgedi, cacenni, byns a melysion siocled
• Lleihau siwgr sy'n cael ei ychwanegu i ddiodydd meddal
• Gwneud meintiau llai un dogn ar gael yn haws ar gyfer melysion siocled a diodydd meddal

Ar hyn o bryd, yn y DU, rydym yn bwyta gormod o fraster dirlawn sy'n ffactor risg sylweddol mewn clefyd coronaidd y galon.

Mae'r argymhellion penodol yn cynnwys:

• Lleihau lefel y braster dirlawn mewn rhai melysion siocled (bariau sydd â llenwad) o leiaf 10%
• Lle mae diodydd meddal yn cynnwys siwgr ychwanegol, gwneud meintiau dogn sengl o 250ml ar gael
• Lleihau'r lefel o fraster dirlawn mewn bisgedi plaen melys a sawrus, a chacenni plaen o leiaf 10%, a 5% mewn bisgedi a chacenni heb fod yn rhai plaen

Bydd argymhellion pellach yn dilyn yn yr haf ar gynnyrch llaeth a chig, crwst a byrbrydau sawrus.

Mae'r argymhellion yn adnabod ac yn croesawu'r cynnydd y mae llawer o gwmnïau bwyd eisoes wedi'i wneud ac yn herio'r diwydiant bwyd cyfan i symud tuag at gynnyrch mwy iach.

Mae'r Asiantaeth hefyd yn ymgyrchu i godi ymwybyddiaeth o'r peryglon i'n calon o fwyta gormod o fraster dirlawn ac mae ganddi gyngor ar ffyrdd hawdd i dorri i lawr.